विश्वमा अमेरिकी साख सन् २००३ पछिकै कमजोर

अमेरिकी राष्ट्रपति डोनाल्ड ट्रम्पले मेक अमेरिका ग्रेट अगेनको नारा दिइ रहे पनि विश्वमा अमेरिकाको साख खस्किएको विश्व सर्वेक्षणले देखाएको छ । अमेरिकी अनुसन्धान संस्था, प्यू रिसर्च सेन्टरले हालै विश्वका १३ देशमा गरेको सर्वेक्षणमा बाहिरी विश्वमा अमेरिकी साख सन् २००३ पछिकै कमजोर पाईएको हो ।

विश्वका सम्पन्न देश अस्ट्रेलिया, बेल्जियम, क्यानडा, डेनमार्क, फ्रान्स, जर्मनी, ईटाली, जापान, नेदरल्याण्ड, दक्षिण कोरिया, स्पेन, बेलायतका नागरिक माझ सर्वेक्षण गरिएको थियो । सर्वेक्षणमा ४१ प्रतिसत बेलायतीले अमेरिका प्रति सम्मान व्यक्त गरेका थिए भने फ्रान्सेली र जर्मनमा अमेरिका प्रतिको सम्मान निकै कम थियो । ३१ प्रतिसत फ्रान्सेली र २६ प्रतिसत जर्मन नागरिकले अमेरिकाप्रति सम्मान व्याक्त गरेका थिए ।

अमेरिकाप्रतिको सम्मानमा कमी आउनुको कारण राष्ट्रपति ट्रम्पको व्यवहार रहेको बताईएको छ । ट्रम्पको असत्य कुरा मात्र बोल्ने, आप्रवासीप्रति अनुदार, जलवायु परिवर्तनप्रति उदाशीन, विश्व अर्थतन्त्रमा निकृष्ठ हस्तक्षेप र मध्यपूर्वमा अशान्ति फैलाउने व्यवहार जिम्मेवार रहेको सर्वेक्षणका सहभागीले बताएका छन ।

जनमत सर्वेक्षणमा विश्वका शक्तिशाली नेताहरुमा ट्रम्प सवैभन्दा कमजोर देखिएका छन । केवल १६ प्रतिसतले ट्रम्प प्रति विश्वास देखाएका छन भने सबैभन्दा बढी जन विश्वास जर्मन चान्सलर एन्जेला मार्केलको पक्षमा छ । ७६ प्रतिसतले उनीमाथि विश्वास रहेको बताएका छन् । जन विश्वास गुमाउनेमा रुसी राष्ट्रपति पुटिन र चिनी राष्ट्रपति सि पनि छन । उनीहरुप्रति क्रमशः ७३ प्रतिसत र ७८ प्रतिसत सहभागीले अविश्वास जनाएका छन ।

असत्य कुरा बोल्नेमा ट्रम्प विश्वका नेतामा अगाडी छन । उनले हजारौ पटक असत्य कुरा बोलेका छन् । फ्याक्टवा डट से ले गरेको अध्ययनमा ट्रम्पले डिसेम्बर १६ पछिको १० महिनामा ट्रम्पले फेक न्यूज शव्द दुई हजार पटक बोलेका छन । पहिलो पटक डिसेम्बर २०१६ मा फेक न्यूज शव्द बोलका ट्रम्पले सन २०१८ को पूवार्धमा सबैभन्दा धेरै असत्य कुरा बोलेका थिए । उनकै कारण सन २०१८ को सूरुका महिनामा गुगलमा फेक न्यूज शव्द सर्च गर्नेको ताती लागेको थियो ।

कोरोना र व्यापार जस्ता विभिन्न बाहनामा चीनसंग झगडा गरिरहने ट्रम्पको व्यवहारले पनि विश्व समदायमा उनको छवी नराम्रो बनेको हो । यस्तै सिरियाबाट अमेरिकी सैनिक हटाउने आफ्नै निर्णय लत्ताएर फेरी पाँचसय अमेरिकी सैनिक राख्ने निर्णय, अफगानिस्तानबाट सेना हटाउन नचाहनु र ईरानसंग सधै लडाई झगडा चाहने ट्रम्पको स्वभावले पनि उनी अलोकप्रिय मात्र भएनन विश्व समुदायमा अमेरिकाको साख पनि गिराएको सर्वेक्षणमा भनिएको छ ।

स्रोतः सर्वेक्षण, बिबिसी र एजेन्सीहरु

-यादवराज जोशी -इनेपालीसबाट